Жаңалықтар — Страница 9 — Мемориальный музей Ыбырая Алтынсарина

Жаңалықтар10.02.2023

«Бар қазаққа ана едің…»

15 қараша – Ыбырай Алтынсариннің аталас туысы, Қазақстанның халық жазушысы, ақын Мәриям Хакімжанованың туған күні. Осыған орай, Қостанай облыстық Ыбырай Алтынсариннің мемориалдық музейінде 15-қараша күні «Бар қазаққа ана едің» атты әдеби демонстрация өтті.

Іс-шараға Қостанай қаласы білім бөлімінің Мәриям Хакімжанова атындағы №20 жалпы білім беретін мектебінің оқушылары қатысты. Мерекелік шарада М.Хакімжанованың өмірі мен шығармашылығы жайында бейне көрсетілім, таныстырылым түрінде ақпарат берілді. Мәриям Хакімжанованың ұрпақтарынан музей қызметкерлері алған сұхбаттар көрсетілді.

Сонымен қатар, оқушыларға Қостанай облыстық Ыбырай Алтынсариннің мемориалдық музейі қорындағы Мәриям Хакімжанованың жеке заттарынан құрастырылған экспозиция таныстырылды. Іс-шара соңында оқушылар М. Хакімжанованың өлеңдерін оқып, кешті ерекше әсерге бөледі.

Жаңалықтар10.02.2023

«ДАЛАНЫҢ ТАЗА БҰЛАҒЫ» кітабының тұсаукесері

Кітап көп жылдық мұрағаттық, экспедициялық зерттеулер материалдарына негізделіп жазылып, 5000 данамен шықты. Экспедициялық топ Ыбырайдың ізімен Ресей және Қазақстан аумағындағы мұражайларды зерттеп, жеті мың шаршы шақырым жерді шарлап, көптеген құнды эксклюзивті фотосуреттер мен видео деректерге қол жеткізді. Бұлардың бәрі кітап бетінде оқырман назарына ұсынылып отыр. Сонымен қатар, кітап ішінде орналастырылған QR код көмегімен деректі фильм, сондай-ақ, аудио иллюстрация ретінде танысуға, Ы.Алтынсарин әлемімен кеңірек танысуға мүмкіндік берілген.

Екі тілде жарық көріп отырған кітаптың авторлары: Марғұлан Оспанов, Салтанат Өтелбаева. Кітапқа алғысөз жазған ақын, жазушы, филология ғылымдарының кандидаты, Ахмет Байтұрсынұлы атындағы ҚӨУ профессоры, халықаралық шығармашылық Академиясының корреспондент-мүшесі, ҚР мәдениет қайраткері, Қазақстанның құрметті журналисті Ақылбек Шаяхмет. «Алматыкітап» ЖШС басшылығы ұлт пен ұрпақ жанашыры ретінде танылған тұлғаны жаңа қырынан тануға бағытталған бұл кітаптағы тың деректер мектеп бағдарламасына да енгізілетінін атап өтті.

Кітаптың таныстырылымына «Алматыкітап» баспасы көркем әдебиет бөлімінің бас редакторы Альмира Сужикова, РФ Челябі облысы, Троицк қаласының өкілдері, ыбырайтанушы ғалымдар, ардагер ұстаздар, Ы.Алтынсарин медалінің иегерлері, облыстық басқармалардың басшылары, мектеп директорлары, өңіріміздің зиялы қауым өкілдері қатысты.

Жаңалықтар10.02.2023

Троицкіде тәлім алған зиялылар

Ыбырай музейі Троицк өлкетану музейімен бірлесіп, «Троицкідегі оқыған қазақ зиялылары» атты халықаралық дөңгелек үстелін ұйымдастырды.
Екі музей арасындағы өзара ынтымақтастық туралы жасалған меморандум аясында өткізілген іс-шараға Троицк өлкетану музейінің директоры Е.Подгайко, экскурсия жүргізушісі В.Шакенова, Челябі және Троицк қалаларынан «Жақсылық», «Арман», «Мұрагер» атты қазақ ұлттық-мәдени орталығының жетекшілері қатысты.

Дөңгелек үстел жұмысына филология ғылымдарының докторы, Челябі мемлекеттік университетініңфилология кафедрасының профессоры М.Қадралинова, тарих ғылымдарының кандидаты, Челябі мемлекеттік университетінің профессоры С.Самаркин, А.Байтұрсынұлы атындағы Қостанай өңірлік университетінің профессоры, философия ғылымдарының кандидаты, ыбырайтанушы Қ.Жақып, Троицк өлкетану музейінің экскурсия жүргізушісі В.Шакенова Троицк қаласы және сонда оқыған қазақ зиялылары жайында тарихи деректі мәліметтермен бөлісті.