1 маусым – Халықаралық балаларды қорғау күніне орай Қостанай облыстық Ы.Алтынсарин мемориалдық музейі «Бақытты балалық шақ» мерекелік іс-шарасын өткізді. Қостанай қаласының №15 бөбекжай-бақшасының «Қарлығаш» және «Балдырған» топтарының тәрбиеленушілері Қазақстан Республикасының әнұранын салтанатты түрде шырқады. Іс-шара барысында балалар «Арқан тарту», «Ақ серек-көк серек», «Асық ату» және «Қыз қуу» сияқты ұлттық ойындарын ойнады. Мереклік іс-шара соңында музей қызметкері, балабақша топтарына «Ең мықты» деген жазуы бар төсбелгілер мен алғыс хаттарды табыс етті
Қостанай облыстық Ыбырай Алтынсариннің мемориалдық музейінде Саяси қуғын-сүргін және ашаршылық құрбандарын еске алу күніне орай, репрессия құрбаны 1937 жылы Бейімбет Майлинді жақтасып сөйлегені үшін түрлі айыптар тағылып, абақтыға қамалып, кейін ату жазасына кесілген Нұрхан Еленовтың 130 жылдығына және Қостанайдағы саяси қуғын-сүргін құрбандарына орнатылған ескерткіштің ашылғанына 20 жыл толуына орай «Ат деген кім? Атқан қайсың?» тарихи-танымдық кеш болып өтті.
Іс-шараға жазықсыз қуғын-сүргін құрбаны болған Нұрхан Еленовтың ұрпағы Стахан Еленов және зиялы қауым өкілдері, тарихшы ғалымдар, магистранттар, докторанттар қатысты. Өткен ғасырдың 30-40 жылдарындағы жаппай саяси құрбандардың қылмыстық істерін қайта тергеп, оларды ақтап шығару жолында көп еңбек еткен ҚР Ұлттық қауiпсiздiк комитетi органының құрметті ардагері Ғалихан Мәулетов Ыбырай музейіне «Ұмытылмайтын қасірет», «Қалдырған ізің мәңгілік» кітаптарын табыс етті. Мұхаметжан Сералиннің ұлы Сәліммен Троицк қаласында бірге оқыған, ұлт руханиятына зор үлес қосқан Нұрханның ағасы Жұмаш Еленов жайында Филология ғылымдарының кандидаты, ыбырайтанушы ғалым Серікбай Оспанұлы тың деректермен бөлісті. Кеш барысында Нұрхан Жүзікей ұлының 130 жылдығына арнап Ыбырай музейі арнайы деректі фильм түсіріп, көпшілікке осы фильмнен үзінді көрсетті. Сондай-ақ, Л.Толстой атындағы Қостанай облыстық ғылыми әмбебап кітапханасымен бірлескен «Зұлмат жылдардың зардабы» тақырыбында көрме жасақталып, көрермендер назарына ұсынылды.
2023 жылдың 26 мамыр күні Қостанай облыстық Ы.Алтынсариннің мемориалдық музейі «Қазақ даналығы қанатты сөздерде» тақырыбында Ы.Алтынсарин шығармашылығы бойынша фольклорлық сағат өткізді.
Фольклорлық сабаққа Қостанай қаласының №11 жалпы білім беретін мектептің 6 «Ә» сынып оқушылары қатысты. Ұлы ұстаз Ыбырай Алтынсариннің педагогикалық және шығармашылығы туралы мәліметтер берілді. Қатысушылар берілген тапсырмаларды тиянақты орындап, мектеп бағдарламасындағы Ы.Алтынсариннің шығармаларындағы өлеңдерін мәнерлеп оқып берді.
18 мамыр – Халықаралық музейлер күніне орай Ы.Алтынсариннің Қостанай облыстық мемориалдық музейі «Музей түні» жобасы аясында Ы.Алтынсарин негізін қалаған қолөнер мектебінің 140 жылдығына арналған қостанайлық қолөнер шеберлерінің музейлік көрмесін ұйымдастырды.
Іс-шара музейдің аумағынан ән шашумен басталып, Қостанай қаласының орталық ойын-сауық көшесінен жүріп орталық алаңға жиналған көпшілікке музей түнін хабарлап, лотореялық ұтыстары бар шақыру қағаздарын аю мен қоян киімін киген қуыршақтар үлестірді.Облысымызға танымал өнерпаздардан құрылған ұжымның концерттік бағдарламасын тамашалаған жұрт музейге бас сұғып, қолөнер бұйымдарымен танысты.
Халық қолөнерінің бай мұраларының бірі ағаштан түйін түйіп, түрлі бұйымдар мен музыкалық аспаптар жасаған шебер, жоғары санатты актер, ҚР мәдениет қайраткері, он саусағынан өнер тамған Қабдол-мәжит Иманов, Республикаға белгілі суретші, мүсінші Мұханбетқали Рахалиев қатысып, жасаған қолөнер бұйымдарын көрмеге қойып және олардың жасалу жолдарын көрсетіп отырды.
Сондай-ақ, суретші Баян Баталова, тігіншілер Меңдігүл Сарина, Дария Едігенова, Нәзипа Әлімбаева, маржан тастардан тізбектеп, тоқыма өнерін меңгерген Қымбат Базар, қолөнер саласындағы жаңа технологияларымен көзге түскен ағайынды Аңқауовтардың шеберлік бұйымдары, теріден тігін тігіп, тұрмыстық бұйым әзірлеуші шебер Айдын Диханбаевтың сүйіспеншілік пен, қиял-ғажайып ойлардан туған туындылары айшықты түрлі-түсті бояулармен қаныққан, табиғи қой жүнінен жасалған түрлі сувенирлік және тігіншілер бұйымдары мен қайыстан жасалатын тұрмыстық заттарды көпшілік назарына ұсынды. Сонымен қатар, саз балшықпен иленіп жасалатын бұйымдардан, «Өркен» студиясының оқушылары шеберлік сағат көрсетті.
Экраннан әлем және Қазақстан музейлері туралы құнды экспонаттармен таныстыратын слайдтар топтамасы көпшіліктің таным көкжиегін арттырды.
Лоторея билеттері ойнатылып, келушілерге ұтыс сыйлықтары берілді. Музей экспозициялары мен жәдігерлер жайында түрлі сұрақтар қойылып, танымдық ойындар, викториналар өткізілді.Келушілер X।X ғасыр сыныбында Ы.Алтынсариннің сабақ беруін сомдаған актер М.Жапаровты ынтамен тыңдап, қонақтар Ыбырай заманына сапарлағандай ерекше әсер алды.
2023 жылдың 17-мамырында Қостанай облыстық Ыбырай Алтынсариннің мемориалдық музейінде Қостанай педагогикалық колледжінің 1 курс студенттеріне «Қазынаға айналған оқулық» тақырыбында Ыбырай Алтынсариннің «Мұсылманшылықтың тұтқасы» кітабы бойынша интерактивті сабақ өткізілді.Танымдық сабаққа Қостанай қалалық «Марал ишан» мешітінің ұстазы Гүлдана Жаңабайқызы қатысты.Іс-шара барысында Ыбырай Алтынсариннің діни танымы және «Мұсылманшылықтың тұтқасы» кітабының маңызы, тәрбиелік мәні жайында ақпарат берілді.
2023 жылғы 15 мамырда Қостанай облыстық Ы.Алтынсариннің мемориалдық музейінде «КСР халық ағарту саласының үздігі» және «Ыбырай Алтынсарин» медалінің иегері, Қостанай қаласының Құрметті азаматы Беген Қаженұлы Көпештің 85 жасқа толуына орай «Ағартушы аманатына адал азамат» атты кездесу кеші өтті.Ұзақ жылдар ұстаз болып қызмет атқарып, іскерлігімен, ұйымдастырушылық қабілетімен азаматтық тұлғасын қалыптастыра білген Беген Қаженұлының саналы ұрпақ тәрбиелеуде сіңірген еңбегі ұшан-теңіз. Оқу-тәрбиелік жұмыстың қыры мен сырын жетесіне дейін біліп, біліктілігінің арқасында біраз белестерді бағындырды. Кездесу кешіне Қостанай облысы әкімінің орынбасары Ринат Мұхаметқалиев арнайы қатысып, облыс әкімінің құттықтауын жеткізді.«Ардагерлер ұйымы» Республикалық қоғамдық бірлестігінің Қостанай облыстық филиалының төрағасы Батырбек Ахметов, «Өрлеу» біліктілікті арттыру ұлттық орталығы акционерлік қоғамының Қостанай облысы бойынша Кәсіби даму институты филиалының басшысы Марионелла Слесарь, Ы.Алтынсарин мектеп-интернатында ұзақ жылдар қызмет атқарған, басшы болған білікті ұстаз «Ыбырай Алтынсарин» төсбелгісінің иегері Сәбира Қайырова, облыстық локальдық кәсіподақ ұйымының атынан Шолпан Сейтқожина Беген Қаженұлына жылы лебіздерін білдіріп, өнегелі өмірі мен қызметі жайында сыр шертті.
Беген Қаженұлының ағартушылық қызмет жасаған білім ошағы Ы.Алтынсарин атындағы мамандандырылған мектеп-гимназиясы ұстаздары атынан Гүлмира Тасанова құттықтады. Беген Қаженұлының тәлімін алған шәкірттері ақжарма тілектерін жеткізді.
